வரலாறு உனது

வரலாறு உனது

 சிந்தனை கவிஞர் கவிதாசன்

வரலாறு பேசும்
தகுதியின் விளிம்பில்
நீ தவம் இருந்தால்
வாய்ப்புகள்
உன்னிடம் வாய்புக்கேட்கும்!

எழுச்சியின் முகட்டில்
நீ ஏறி நின்றால் -
விடியல்கள்
உன்னிடம் வெளிச்சம் கேட்கும்!

சுறுசுறுப்பின் விழுதுகளில்
நீ ஊஞ்சலாடினால்-
மின்னல்
உன்னிடம் மின்சாரம் கேட்கும்!

வியர்வையின் புதல்வனாய்
நீ புறப்பட்டால்-
முன்னேற்றம்
உன்னிடம் முகவரி கேட்கும்!


பிரபஞ்சமெங்கும்
உனது மனதை விரித்தால்-
நட்பு
உன்னிடம் ஆயுள் கேட்கும்!


முயற்சியின் முதுகில்
சவாரி செய்தால்-
சாதனைகள்
உன்னிடம் தஞ்சம் கேட்கும்!

தினங்கள் தோறும்
திறமைகள் வளர்த்தால்-
தன்னம்பிக்கை
உன்னிடம் நம்பிக்கை கேட்கும்!

வீழ்ச்சிகள் தோறும்
எரிமலை ஆனால்
வரலாறுகள்
உனது வரலாறு பேசும்!!